Der Ueli meint

Hesch o langsam d Nase vou vo däm Chäfer Corona? Bisch uf au Fäu nid elei, I ghöre afe fasch nume no dass aui nümme möge. Aber was wosch da lang chniepe. I bi itze für mi einisch häreghocket u hamer im Blöckli notiert, wass i aus nümme cha wägem Bundesalä won is da au Wuche nöis wott vrbiete.

Auso turne tarf i nümm, wobi i turne gar nie. Vo däm her isch das nid auzu wiud. 

Singe tarf i au nümm, aber im Männerchor bini ja nid, wüu i ha die Teggschtte nie chönne uswändig lehre u drum hei si mer gseit, los Üelu tue du gschider witerhin d Billie verchoufe am Theäterli au Jahr. 

U wenn i umbedingt eis wott jutze im Wageschopf wüus dert no guet tönt, fragen i de sicher nid d Regierig, öb i das dörf. Vo däm här bin i da o nid eso betroffe. 

Schlussäntlech han i no notiert, dass i nid i d Wirtschaft darf u ehrlech geseit isch itz das o nid sövu unerchannt schlimm, wüu meischtens han i am nächschte Tag sowiso nume Gringweh wenn i mit em Kürtu verhocke. Auso, Kopf hoch, gäu!

Ueli dr Schribchnächt